Listings Comments
News Comments
|
News Page
نعود اليكم بالاخبار الجديدة .. كل يوم 3 دقائق على سيارتي المعلومات
Dec 06,2010
رامي مهداوي عن اشارات المرور
الإشارة بتضوي وبتطفي
كبتت على كيبورد رامي مهداوي
أبوس اديكم ودلوني مين المسؤول عن إشارات المرور" الرمزورات" في البلد؟ عشان أروح أسأله أكم سؤال" فضوليات" اذا ما عندكم مانع، سؤالي الأول: ليه بتطفي اشارات المرور الساعة 8:30 بالليل أو أبكر شوي؟ يعني بنوفر كهربا مثلاً، ولا التوقيت الشتوي بختلف فبنطفي الاشارات..!! بحكي جد بدي سبب واضح ليه بنطفي الاشارات بدري وبنخليهم يشتغلوا بس على الضو الأصفر بضوي وبطفي...بضوي وبطفي...وباللون الأصفر...نمشي بالسيارات ولا انوقف ...والإشارة بتضوي وبتطفي..طيب شو نعمل؟
يعني لو اننا بنلتزم بقوانين السير أكيد ما راح أكون على مفرق والإشارة بتضوي وبتطفي..وبصير أفكر الحق لمين...أتحرك ولا ما أتحرك..السيارات داخله في بعض...أي احنا ياااا دوب ولما يكون في أحمر وأخضر وأصفر ويااا دووووب لنلتزم بالقانون ونمشي صح.... وهلأ صار في حجة مقنعة للفوضى...بتعرفوا احنا شعب بتنازلش عن حقه...فبتصير الأزمة ...وكله بسبب انه الاشارة طفينها مع أذان العشاء...أفهم لييييييه؟ ولا ماشيين على نظرية" نيم الاشارة بكير وصحيها بكير وشوف الإشارة كيف بتصير"؟؟!!! أي والله اشي بلخبط...
سبب كتابتي للمقال اني كنت سايق السيارة في أمان الله، وعند مفرق البنك العربي اللي برام الله التحتا، صار حادث شفته من بدايته حتى ضرب البوكسات بين أصحاب السيارات اللي صار معهم الحادث، كل واحد فكر انه الاشارة بتعطي ضو أصفر يعني معاه مجال يقطع المفرق في اتجاه سير السيارة، بس اللي صار انه السيارة اللي متجهة باتجاه الطيرة ضربت السيارة اللي قاطعه المفرق بشكل عرضي، ونزلوا الشباب يصيحوا على بعض كما هو المشهد التالي:
_ الطريق إلي...مش شايف انها الاشاره لساتها صفرة...
_ يا حبيبي انت اللي ما بتشوف الطريق إلي أنا...ولا حضرتك إعمى..الله يلعن ابو اللي أعطاك الرخصة...
_ ولك انت اللي أعمى يا ابن.......
بعد هيك عينكم ما اتشوف الا النور...طوشه...طوشه...والاشاره بتضوي وبتطفي باللون الأصفر...والناس اتجمعت..وحدوا الله يا شباب..وسكرت الطريق..والطوشه شغاله..والناس بتتجمع...وحدوا الله يا شباب...والزمامير شغاله..توووووووووت...تيييييت....شو صار...شكله حادث...والاشاره بتضوي وبتطفي...والله وكيلك ما حدى عرف على مين الحق....واحنا شعب بحبش نتنازل عن حقوقنا...
السؤال الثاني، اذا خربت إشارة المرور_وما اكثر خرابهن_ قديش بدنا وقت عشان انصلحها؟ يوم..اسبوع...اسبوعين...شهر..نص سنة..سنة...بدي جواب واضح...عشان نحاسب ونسأل المسؤول عن الإشارات..تخيلوا معي...اذا أهم إشارة مرور موجودة عنا في الضفة الغربية من حيث الموقع والأمن..هي إشارة المرور اللي قبال بوابة المقاطعة "مقر السيد الرئيس" في شارع الإرسال برام الله اللي جنب محل الخضرة...اللي صار محل عصير، كلللل ما تخرب هاي الإشارة " بطولواااااا جماعتنا ليصلحوها...تسألينش قديش وقت..ما بعرف والله!!....والشرطي الموجود دايماً هناك، الله يعطيه العافية بشتغل شغل من قلب ورب...بس شو بده يلحق ليلحق؟؟!!
المهم ليش البطئ ولا أقول التباطؤ في التصليح؟ وليه بتخرب اشارات المرور باستمرار؟؟ يعني النوعية مش منيحة؟ الطقس مش مناسب؟ تركيبهن بالأساس غلط؟؟ ما في صيانة؟؟ وكمان اللي بصلح الإشارات شركة؟ موظف؟ بنحاسبهم على شغلهم؟ ولا عشان ما بنحاسبهم وبنجننهم بالدفع بدهم يجننوا الشعب في شغلهم؟؟ ولا فيه نقص باليد الماهرة المختصة بتصليح الإشارة المرورية عشان هيك مش ملحقين على الشغل؟؟ معناه بسوى الامر انوجه الشباب لتعليم هاي المهنة مثلاً..
السؤال الثالث: كيف بنحسب توقيت إشارة المرور؟ يعني مش بس كم وقت لضوء الأخضر؟ والأحمر؟ والأصفر؟ وكم وقت للإشارة الوحده؟؟ وخصوصاً للي بكونوا على مفترقات الطرق... بتحس انو في تمييز عنصري مع إشارة ضد إشارة لللي بكونوا على المفترق الواحد.
يعني ما بتلحق تمرق السيارة اللي قدامك، إلا الإشارة قالبه أصفر على أحمر..فممكن انت بتيأس وبتطلع ...مثل ما كتير بعملوا ...وبتعرفوا انا دايماً بوقف مع المضطهدين..فصار لازم أحكي عن الاضطهاد المروري....الله يسترنا من الحوادث...
وعشان هالثلاث أسئلة، طنيب عليكم لو اتعرفوني على مسؤول إشارات المرور في البلد...عشان أعرف الجواب..بس بتمنى عليه ما يوخدني لأي مكان ما في إشارات مرور ..أو ما في ضوء من أساسه...فاهمين علي ولا بتحاولوا ما تفهموا...خايفيين تيجوا معي...
|
أخبار يومية
PNN: "نتحدث عن كل شيء إلاّ السيارات"
صفحة خاصة عن اتحاد مستوردي المركبات المستعملة في فلسطين
|
.jpg)
http://www.l7sh.com/vb/t591.html
تسريحات 2012
http://www.l7sh.com/vb/f11.html
برودكاست
http://www.l7sh.com/vb/f11.html برودكاست
http://www.l7sh.com/vb/f11.html
برودكاست
http://www.nono6.com/vb/t7620.html
below.