سيارتي المعلومات

نعود اليكم بالاخبار الجديدة .. كل يوم 3 دقائق على سيارتي المعلومات 

آخر المقالات

موديلات وتقارير

أخبار عالمية

محليات

السلامة المرورية

14.12.2010

رامي مهداوي عن المطبات

مقالة من رامي مهداوي نشرت على بينجوف وجريدة الأيام بعنوان "تصبحون على مطب"

بينجوف / sayarti.ps - بتخيل بإمكاننا أن ندخل كتاب غينس في عدد المطبات الموجودة بشوارعنا ، بنصحى على مطب جديد في الشارع وبعض الأحيان بنتفاجأ انهم شالو المطب...ومرات كتيرة بتخلع سيارتك في المطب لأنهم رجعوا المطب وانت بتكون مركن انو ما في مطب، بس احلى ما في الموضوع انو الاذاعات والتلفزيونات المحلية بتصير تشتغل" انت كمواطن مع المطب؟ ولا مع إزالة المطب؟" " هل بإعتقادك المطب بقلل حوادث السير؟!" بس بنسوا يسألوا شو ضرر المطبات على السيارة. يعني السيارة كأنها ما بتضرر من هالمطبات التي بتشبه كل شي الا المطبات مثلاً بتشبه التله..سنام جمل ... فالمطبات مثل لاعب الملاكمة توجه كثير من الضربات واللكمات اللي بتوجع للسيارة في المنطقة السفلية من هيكلها الهزيل. وأكيد بتتذكروا جبال المطبات اللي كانوا في شارع قرية أبو قش_ القرية الواقعه ما بين بيرزيت ورام الله_ نحمد الله على وضع تعديلات وتجديدات عليه مؤخراً.

المهم قررت أدرس أثر المطبات على السيارة فاكتشفت: تفكك الصواميل والمسامير المثبتة لأجزاء السيارة، كسر أحد المساعدين أو السوست أو الثنين، كسر أحد المقصات، كسر في أحد الكبالن وبيض الدركسيون، كسر في الميزان أو واحد من الشدادات، حدوث اعوجاج بالقنطرة القدمانية الطولية أو العرضية أو الخلفية،خراب قواعد المحرك أو صندوق التروس وإطارات الكاوشوك أو جنط العجل، تلف علبة الشكمان، تلف علبة الستيرنغ وبيل العجل الأمامي أو الخلفي، كسر أي جزء من الأجزاء السفلية بالسيارة مثل المحرك أو صندوق التروس أو الردياتير، انحراف زوايا اتزان السيارة.

يعني الموضوع بدو ميزانية خاصة للمطبات، بالإضافة التصليحات الأخرى التي تحتاجها السيارة. وممكن انت تنزل في المطب و تكسر ماسورة ماء وتدفع سعرها ..كيف؟ نجد المواطن أو شركة المياه يقوما بحفر أخاديد تتراوح أعماقها بين 20-30 سم، في الشارع بعد إزالة مادَّة "الزفته" الإسفلت بهدف إيصال الماسورة بشبكة المياه ،وبتركوها بعد مد الخط مثل ما هي.

وكمان هناك مطبات من نوع مختلف آخر، مطبات من صنع المواطنين يعني كل مواطن بحط مطب أمام بيتو. نوع المطب بكون اسمنتي قوي مجبول بالحصى. وفي مواطنين بحطوا ماسورة حديد وفوقيها الاسمنت. ولا تستغربوا أن واحد من المواطنين من منطقة الرام قال لي ان جاره المصون وضع مطباً أمام بيته لأن أولاده دايماً بلعبوا في الشارع ومن خوفه عليهم عملهم مطب. بتمنى انوا يكون هناك غرامات ومخالفات على كل واحد بعمل مطب في الشارع، وإزالة المطبات الموجودة حالياً والمنفذة عن طريق الاجتهادات الشخصية للمواطنين.

الله يكون في العون، يعني شوارعنا ناقصها شمينتو، شوارعنا مثل ما واحد حكالي " انو الحفرة لازقه في العجل". وأزيدكم كمان مشكلة في مشكلة ترك أغطية الصرف الصحي ظاهرة في الشوارع اللي بزفتوها في هالأيام ببعض محافظات الوطن، وبمناسبة الشوارع الجديدة بتمنى من مهندسي الطرق يوضعوا علامات تحذيرية فسفورية قبل أي مطب بمسافة كافية، دهان المطبات بلون فسفوري لتكون واضحة بالليل، إلغاء المطبات المفاجئة في الطرق السريعة.

شو تعليقك ع الموضوع؟